قررت اشتغل حر والحمد لله

بجد انا بشكر القائمين على الجروب لأنه بالفعل جروب محترم 

وانا حابب اشارك تجربتى

انا اتخرجت من الجامعة 2011 اشتغلت ف شركات كتير لحد 2013 ومعملتش جنيه كنت اللى بجيبه بيتصرف على الارض 

لحد ما قررت اشتغل حر والحمد لله فتحت شركة من 2013 

مكافحة افات صحة عامة واشتغلت كويس جدا وابتدت المصانع تمشى بسياسة احنا ليه نجيب شركة مكافحة لما ممكن نجيب عامل ونجبله رشاشة مبيدات ونديله 650 جنيه ف الشهر 

المهم قفلت الشركة 2015لان كان فيه ناس كتير شغاله معايا ومرتبات ومبيدات كنت بستوردها لحد ما لقيت ان كده هيبقى فيه خسارة فادحة فقفلت واشتغلت فى التجارة ومن ساعتها الى الأن فى التجارة 

واكتشفت ان اللى عايز يعيش مستور بفضل ربنا طبعا لازم يشتغل فى التجارة فى كل شئ حلال ملابس مواد غذائية الدهب الكسر الادوية الاحذية مواد البناء قطع غيار العربيات لعب الاطفال 

حتى فوانيس رمضان اشتغلت فيها والجميل فى الأمر انك لما بتشتغل كتير دايرة علاقاتك بتكبر وبتوسع 

واللى اتعلمته من التجارة حابب اشاركه معاكم 

١/ البلد فيها ركود البلد اقتصادها ميت، ملكش دعوة بالكلام ده ربنا هيرزقك على قد سعيك وجهدك وطلع صدقة 

٢/ استثمر وجازف بخطوات محسوبة ومتحطش البيض كله فى سلة واحدة 

متحطش كل فلوسك فى نشاط واحد ولما تحط فلوسك فى ناشط متحطش مبلغ كبير جرب ف مبلغ صغير الاول لحد ما تفهم الدنيا ماشية ازاى عشان لو خسرت خسارتك متوجعكش 

3/ مش عيب تسأل وتدور وتشوف ده على ارض الواقع 

4/ قلل التكاليف الخارجة منك قدر استطاعتك واقتصد 

5/ اشتغل 15 ساعة ونام الباقى ولو قدرت تشتغل 20 ساعة اشتغل 

6/ اى منتج هتبيعه لو فيه عيوب عرف العميل ايه عيوبه حتى لو العميل مخدوش انت كده كسبان 

7/ مظهرك مهم لانه عنوانك واسلوبك مهم لأن ده 70٪ نجاح من عملية البيع او الشراء

8/ لو حد بيشتغل معاك ابسطه وحسسه انه صاحب الشغل لكن قاعدة عملائك انت احتفظ بيها لنفسك فقط 

9/متخافش من الكلام المحبط ( السوق واقع، هتخسر، المنتج ده مش شغال،)  ربنا هو اللى بيرزقك وانت بتسعى 

10/العميل المصرى من اسهل العملاء ف العالم وابسطهم ومتبعش الفول للاثرياء على انه مربى ومتبعش المربى للفقراء على انه فول / افهم واعرف مستوى العميل المادى ايه عشان تعرف تبيعله صح

١١/ ابعد عن القروض محدش خد قروض وفلح 

١٢/ متستعجلش الربح السريع انت مش هتبقى مليونير فى شهر 

١٣/ حافظ على سمعتك لان لو فاتح نشاط وسمعتك حلوة وجمبيك الف واحد فاتح نفس نشاطك سمعتك هى اللى هتنجحك 

١٤/ مصر دولة مستهلكة حاول تبقى انت منتج او مصنع ومتبعش جملة بيع قطاعى للمستهلك بشكل مباشر 

١٥/حتى لو كان راس مالك قليل او معدوم متيأسش اخرج بره الصندوق بعقلك وهتلاقى ان راس مالك بيزيد 

واخيرا 

ثق فى الله انك هتنجح طالما انت بتسعى وكتر من الصدقة.