كهرباء المطاحن و طرق التشغيل - منتديات تكنولوجيا الطحن

كهرباء المطاحن و طرق التشغيل - منتديات تكنولوجيا الطحن

نقلا عن م محمود مسعد (المعروف وسط العمل ب محمود كنترول)

نبدء بسم الله الرحمن الرحيم في الحديث عن الكهرباء
ان شاء الله حديثنا محدد اليوم عن كهرباء المطاحن و طرق التشغيل .

أول شئ ما هي نوع الكهرباء المستخدمه في المطاحن
وما هى تقسيمة جهود الفولت المستخدمة ؟

من أول 0 الي 1كيلو فولت يسمى جهد منخفض
يعني حتى 1000 فولت يسمى جهد منخفض

طبعا نسمع عن الضغط العالي ما هو الضغط العالي ؟
يقولك شغال 380 فولت وهذا كلام دارج غير صحيح

حيث المطاحن كلها يكون فيها محول خاص يبدء من 500 كيلو فولت امبير ودخول المحول بيكون 11 كيلو فولت والخروج بيكون 380 فولت يبقي بدايه الكهرباء في المطحن من جهد متوسط .
وليس لنا علاقه به حيث يتعامل معه شركه الكهرباء لان له احتياطات أمان وأدوات في التعامل .

إذن يبدء تعاملنا من أول الجهد المنخفض 380 فولت أو ال 400 فولت .
المحولات المستخدمة يكون فيها tap changer
وهذا مثل المقاومه المتغيره لكى نتحكم في فرق الجهد لو الجهد عالي نقلله أو العكس .
طبعا التغير هيكون سببه ارتفاع أو انخفاض الدخول ايضا لكن لو كهرباء المنطقة عاليه باستمرار هتضطر تقلل المحول لكى تحصل على جهد مناسب ولو الكهرباء منخفضة هترفع المحول .

ندخل في الموضوع الاساسي وهو طرق التشغيل
بداية يوجد نوع واحد من المواتير في مجال المطاحن
وهو المواتير الحثيه AC induction motor
ولا يوجد أي أنواع مواتير DC لأن مواتير ال DC مكلفه ومشاكلها كثيره في الصيانه ،لكن في صناعات بتعتمد عليها بشكل أساسي مثل مصانع الغزل والنسيج .
ولكن مشاكل مواتير ال AC تقتصر علي مشاكل ميكانيكيه مثل البلي أو أنه يتلف (يتحرق) وهذا سهل اللف وليس مكلف .

طيب المواتير بنشغلها ازاي ؟
أول طريقه تشغيل هو التشغيل المباشر direct on line



يتم عمل دائرة ستارت ستوب عاديه لكى اتحكم في تشغيل الكونتاكتور
والطريقه هذه تستخدم في تشغيل المواتير الصغيرة
لأن التوصيل المباشر يكون تيار بدء التشغيل الخاص به يساوى 6~8 مرات التيار المقنن .

تيار التشغيل العادي وتيار بدء التشغيل بيفرق من موتور للتاني عن طريق طريقة ربطه الميكانيكيه مع الحمل من عدمه
موتور ع الفاضي / موتور ع كوبلن / موتور ع جيربوكس / موتور بيسحب حمل

طريقة التوصيل المباشر بنستخدمها لحد الان لحد.قدره 11 كيلو وات

مفيش مشكله نعمل ستار دلتا لموتور 11 كيلو
بدءا من 15 كيلو وات استخدمنا طريقه تشغيل اخري وهي ستار دلتا
طيب بعيدا عن القدره للموتور امتي نقدر نشغله ستار دلتا؟
لازم يكون جهد المصدر المتاح يشغل الموتور دلتاااااااا
والكلام هنا عن مصر
جهد المصدر المتوفر عندي هو 380 فولت
يبقي لازم الموتور يكون بيشتغل دلتا فقط ع جهد 380 فولت
ودا نعرفه منين؟
من ال nameplate للموتور
لازم تقرا لوحه البيانات الموجوده ع الموتور كويس قبل التوصيل
لو الموتور منغير لوحه بيانات متوصلوش
الموتور اللي بيتوصل دلتا هتلاقي عليه جهد التشغيل 660/380
الرقم الكبير دا جهد تشغيل ستار
الرقم الصغير دا جهد تشغيل دلتا
عشان متتلخبطش احفظها الكبير ستار
لقيت رقم جهد التشغيل الصغير 380 او حتي 400 يبقي كدا الموتور بيتوصل دلتا وينفع تعمله دايره ستار دلتا
طب نعمل دايره ستار دلتا ليه اصلا؟
عشان نلاشي تيار البدء العالي اللي قولنا قبل كدا انه بيوصل ل 6 ~ 8 اضعاف التيار المقنن
فاحنا بنوصل الموتور ستار بالجهد الاقل فيسحب تيار بدء اقل بكتير
تقريبا ثلث التيار اللي كان هيتسحب
وبعد زمن نقلب التشغيل ع دلتا
ولكن بنراعي احتياطات في تشغيل ستار دلتا
ان في فتره الستار ميكونش فيه حمل كامل
لان الموتور تقريبا بيشتغل بنص قدرته
لو حصل تحميل عليه هيسخن وممكن يتحرق منك لو موصلش لنقطه فصل الحمايه عندك
بالنسبه لتشغيل ستار دلتا لازم يكون في حمايه من التشغيل الخاطئ وبنعمل حمايه كهربائيه بمنع تشغيل ستار و الدلتا في وقت واحد
ودي حمايه اساسيه
وبنضيف عليها حمايه ميكانيكه كمان بين ستار و الدلتا ودي بتخلي في استحاله بردوا انهم يتقابلوا
مع التطور الطبيعي للتكنولوجيا والاليكترونيات
ظهرت طرق بدء تشغيل حديثه بعد ستار دلتا
ودي بتعتمد علي الاليكترونيات
وظهرت اجهزة soft start
بدء التشغيل الناعم
ودي مفيهاش نقله زي ستار دلتا
دا بيبدء التشغيل ناعم جدا وتدريجي لحد التشغيل النهائي
واجهزة السوفت ستار هي نفس فكره ستار دلتا ان احنا نبدء بجهد قليل طبقا لطريقه التوصيل
لاء هنا ثبت طريقه التوصيل واتحكم في الجهد
الموتور هيتوصل دلتا عادي
لكن الجهاز هيغير الجهد بدء من 0 فولت لحد اما يوصل ل 380 فولت
فكره عمل الجهاز دا بالبلدي عن طريق ثايروترات
زي بوابه علي مجري مائي
كل اما ترفع البوابه كميه الميه تزيد
لحد اما تفتحها خالص وتبقي البوابه ملهاش لازمه
دا اللي بيحصل بالظبط داخل السةفت ستارت

الثارستور بيعدي الجهد تدريجي لحد اما يوصل ل 380 فولت وبعدها الجهاز كأنه ملوش وجود
ويرجع الجهاز يشتغل تاني اما تديله امر ايقاف
بالاضافه لمجموعه الحمايات الداخليه جواه
ظهر السوفت ستارت في مجال المطاحن في تشغيل مراوح النيوماتيك بالتحديد
يديها عمر وفترات تشغيل اطول
وتبعد عن مشاكل الكونتاكتورات لو في حاجه لدعت او لزقت او سقط فازة او كويل باظ
وينصح بالسوفت ستارت في المراوح وانسي المروحه ان شاء الله
لحد هنا كويس
كل شئ او تحسين او تطوير يقابله فلوس
لكن الغالي رخيص ع المدي الطويل
عندي مروحه مثلا مجموعه الكونتاكتورات بتاعتها في ستار دلتا ثمنهم 15 الف جنيه
وجهاز السوفت ستارت يكلف تقريبا 40 الف جنيه
ال 40 الف دول ارخص بكتير من ال15 الف
في سرعه حمايه الموتور من ارتفاع حراره او بلي
او حتي فازة تسقط في الدخول الجهاز هيقف مباشره
لكن في الكونتاكتورات سقوط الفازة هيوصل للموتور
وياتلحقه او متلحقوش ويتحرق
هل في مواتير ستار دلتا ولا كله direct on line
هل كل المواتير هتشتغل بكونتاكتورات ولا جزء هيشتغل باتفرترات
دلوقتي بعض الشركات التركيه بقت تركب سوفت ستارت صغير بدء من مواتير 7.5
السوفت ستارت الصغير دا في حجم الكونتاكتور بالظبط
لكن اليكتروني وليس ميكانيكي
له مميزات وله عيوب بردوا
ميزته تشغيل ممتاز
يغلي سعر اللوحه شويه
ويعيبه ايه بقي
مانا لسه قايل غلو سعره يعني اما استخدمه محل دايره ستار دلتا لموتور 15 كيلو
يوم ما يعطل هيتغير كله
بعكس لو كونتاكتور لدع عندي هاغير واحد من 3
لكن هتاخد جوده تشغيل عاليه
ودي احدث حاجه في المطاحن ..استخدام السوفت ستارت الصغير اللي شكل الكونتاكتور .



صورة لدائرة ستار دلتا


صورة الثايرستور الداخلي اللي بيتحكم في السوفت ستارت